Blaschtigg? Nai dangge!
Blaschtigg, Blaschtigg, nyt als Blaschtigg!
Nyt als Ärger mit däm Blaschtigg!!
Blaschtigg deert und Blaschtigg doo,
Blaschtigg nai – wirsch grangg dervoo!
Mis Hildi hyychlet: „Schorsch, mi Schatz –
Mii stryychlisch nimme, nur no d Katz!
Zem Schmytzle sinn dir d Lippe z gnapp
und zem Dööple baidi Brischtli z schlapp!
Mit Drissig isch me hitt en alti Häx –
ych will en Ops – und dernoo mee Sex!“
Ych schigg e Stossgebätt zem Himmel
und feercht mi feerchterlig um my Pi****…
Bald dernoo phaggt dr Doggter s Hildi uus:
Mii phaggt dr Schogg, und denn dr Gruus:
Ganz us BLASCHTIGG, zwai diggi, roti Lippe,
wie Goggifläsche, kasch nur no draa nippe!
Zwai uffblooseni Bebbi-Segg sinn jetzt dr Buuse
vo miinere Schnepfe, wie wotsch doo schmuuse:
„Die verglepfe jo bim Dööple, das isch e Fruscht,“
saag ich zem Doggter, „doo vergoot mir d Luscht!“
„Kai Problem!“ grinst dä Scheenhaits-Spänder,
„denn implantier ych halt e BLASCHTIGG-Ständer!“
Doggter uff em zwaite Bildigswääg, dä Maa isch hell,
friener het er amme uusbainlet, z Basel, bim BELL!
Blaschtigg, Blaschtigg, nyt als Blaschtigg!
Nyt als Ärger mit däm Blaschtigg!!
Blaschtigg deert und Blaschtigg doo,
Blaschtigg nai – wirsch grangg dervoo!
BLASCHTIGG-Ruggständ findsch hit sogar im Ässe.
Im Kopf vo MUBA-Mänätscher kille die scho ganzi Mässe!
Us de glyyche Grind myyde Veganer au jeedi Kue
und kääsele freelig in „BLASCHTIGG – statt Lääder-Schue“!
D Hirni vo Buebe produziere so au nur no griene Kaabis,
die spinne vom Klima und studiere „Tschender-Staadies“!
Allergie, Unverdräägligkaite und Hypersensibilität
verjaage d Latex-Pariser. Dr Ersatz isch in BLASCHTIGG-Qualität!
Au d Narrefreihait hasse die Studiosi vo Härze.
Die macht settig „Politisch Korräggte“ Schmärze!
Doorum muess d Frau Fasnacht jetzt vor Gricht,
rassistisch syyg si – und au sunscht nit dicht!!!
Aber d „Negro-Rhygass“ macht das gschiggt.
Me zaigt Verständnis, mit em Kopf wird gniggt.
Wie z Afrika bi de „Nääger“ kunnt s grossi Palaver,
und me zerschnuurt dä ideologisch Kadaver.
E diplomatischi Maischterlaischtig. Me macht nyt,
aigetlig, aber irgend eppis doch – bref: Gueti Lyt!
D Negro blibt d Negro, DIE alti, grossi Basler Gugge,
wo alles ka wärde, nur sicher nie e BLASCHTIGG -GUGGE!
Blaschtigg, Blaschtigg, nyt als Blaschtigg!
Nyt als Ärger mit däm Blaschtigg!!
Blaschtigg deert und Blaschtigg doo,
Blaschtigg nai – wirsch grangg dervoo!
Im Ozean, im unäntlig wyte, blaue Meer
händ s hit grossi und glaini Fisch schuurig schwäär.
Die Greessere frässe die Glainere und so wyter
Aber allne goots bim Frässe schyter.
Si kenne schnappe und schlugge, so vyyl si wänn,
si wärde satt, aber es nimmt trotzdäm kai Änd!
Si waggse nimm und blyybe dinn,
will in allne Fisch het s BLASCHTIGG drinn…
Bi uns dehaim gits Muschle, Gräbbs und alli Sorte Fisch.
„So blyybt me schlangg! S git nur no Fisch uff e Disch!“
maint s Hildi und gnaggt mit ire neie Panzer-Lippe
kilowyys Auschtere – und bringt iri Aiwyss-Bilanz zem Kippe.
Kuum het si nämmlig sone Monschter gschpränggt,
rolle scho Perle uuse, das hättsch wirgligg nie dänggt!
Diggi, fetti Glugger, saudyyr, also iiberhaupt nit schtier,
erzyggt vo BLASCHTIGG -Daili in dääne arme Dier!
So bleed und gytig wie mis Hildi sinn d Mensche halt alli!
S Meer und d Fisch sinn aifach e Party mit vyyl Halli-Galli.
Me hoolt uuse, was me grad stääle, verkaufe oder ässe kaa
und schiessts wiider yyne, als Drägg, und nyt isch me draa.
Und au am Rhybord unde hogge si und dampfe.
Das git Hunger und me muess no eppis mampfe.
Frie demorge schwangge si denn haim, die Pflutte –
aber bitte zerscht no dr Drägg in Bach uuse schutte!
Fäldschlessli-PET und fättig Hamburger- BLASCHTIGG vom Megge
schwimme via Rhy ins Meer, wo denn d Fisch veregge…
Roti, Grieni und mir alli fyyre dr Woolstand,
aber im Grossroot erglääre mir jo weenigschtens dr Nootstand!
Blaschtigg, Blaschtigg, nyt als Blaschtigg!
Nyt als Ärger mit däm Blaschtigg!!
Blaschtigg deert und Blaschtigg doo,
d Menschhait kunnt bald nimm dervoo!