Mir sin e gmischti Gruppe vo Fasnächtler, wo sich uff d Faane gschriebe hett, die
heerligi Fasnachts-Zyt vor allem z gniesse und s zämme gmietlig z haa.

Noch vyyle, vyyle Joorzäänt hänn mir is entschyyde, ab 2026 nimm am Cortège
mitzmache. Zem Gässle sin mir am Morgestraich, zoobe und am Zyschtig mit de
Aubäärg-Joggeli unterwäggs.

Dur s Joor duure dräffe mer is mindeschtens 1 x pro Monet im «Aubäärgstüübli» vo de
Aubäärg-Joggeli bi dr Heuwoog oder innere Baiz – vom Daag häär isch es jewyyls e
Zyschtig. Es git au anderi Aggdivitäte, wie Usflüüg oder gmainsami Aesse, aber kai
feschts Jooresbrogramm.

E baar Wort zer Gschicht vo dr BZG

D BZG isch 1965 grindet worde und hett dr 50igscht scho hinter sich gloo! Wies Alter
aane losst, hett d BZG scho Ainigs erlääbt…

Anno 1965 usseme Zyschtigs-Grüppli entstande, hett d BZG als Pfyffer- und Dambuure
Grubbe 50 Joor lang Cortège-Fasnacht gmacht. S Signet isch ab 1965 dr Kopf vo dr
„Alte Dante“ gsi. Zwaimool hett sich d BZG mit ere andere Gruppe zämme do (1989 mit
de Källergaischter / 1994 mit de Route Glunggi) – so isch dr Baslerstaab und s Gleenli
zem Signet vo dr „Alte Dante“ derzue ko.

Vo 2017 bis 2025 isch d BZG als «Grüppli» am Cortège derby gsi.