Wo goots denn aane?

oder:
s Baasler Kaschperli-Theater

Zrugg vo dr Grosswildjagd in Afrika
landet dr Kaschperli uf dr Pischte A.
Är spiilt e Baasler Schugger-Offizier
und isch e VIP in däm Revier.
Syy schwarze Luxus-(Ghaim-)Dienscht-Kaare
schtoot am Fluugi, zem wyter faare.
Dr Schorsch…(spiilt sunscht s Groggodyyl)…
…jetzt aber ain vo dr Beraitschafts-Bolizei,
juggt uuse und salutiert mit waiche Bai:
“Kaschperli, s Gepägg isch jetzt doo…
Wo derf die Faart denn aane goo?
Faare mer zer Villa, dusse bi de Rammel?
Beglait ych d Frau uff em Schopping-Bummel?
Bring ych d Kinder in d Internäschenel-Skuul
und d Katz zem Kater? Aber dä isch jo schwuul!“

Das Heere-Lotter-Lääbe bi dr Bolizei
gilt nur fir d Käschperli, fir sii ganz elai.
Dr aifach Däddel hett d Schnuure z halte,
und stramm z stoo – au die wirgligg Alte!
An dr Hilfteschanz, zmitts in dr Nacht,
Rammel biesse, bis es gracht
in de Gnoche, und d Näärve flattere
vor em Joggeli, wenn d Pyros knattere
und em FCB syyni Kurve-Schleeger
is attaggiere wie Grosswild-Jeeger!
Bim Märtblatz, grad wenn alli schoppe,
will dr schwarzi Blogg uns Baasler poppe.
Mir rugge vor und hyyle wie Gleen
wel mir zmitts im Dräänegaas stehen!
Verhafte mir denn zwai Krawallturischte,
kemme mir vor Gricht…und derno in d Kischte!

D Käschperli gseesch bi soonere Schlacht
nie zvoorderscht, wo s denn bluetig Gracht.
Sie hogge biquääm uff em Fäldherre-Hiibel,
und gnabbere glangwylt an ire gsteilte Neegel.
Noch säggs Stund Nookampf und säggs Stund Pikeet,
bikemme mir denn e Diäät-Löntsch-Phaggeet…
D Käschperli verschiebe – erschöpft vom Grampfe –
diräggt ins Gifthittli, Gordon-Bleu go mampfe.
Si fyyre dr Sieg mit vyyl Rootem und Gschrei…
denn das alles zaalt jo d’Bolizei!

Dehaim goots fuudiblutt ins Bett – wie be de Nomaade…
(giggerig vom Schmontzis mit de straffe Kameraade!)
Scho bald heersch e Kaschperli grässlig steene
und wollischtig syyni schwaissige Gliider deene!
Aaber…doo liige jo ZWAI! Aine grunzt: „Lägg mr!“
Jä nai – doo pennt au no dr Bolizei-Diräggter!!
Sie stregge sich und negge sich: …
’’Gäll, mir Käschperli stegge under ainer Deggi!“
denn brinzle si zämme – ins glyyche Beggi!

Styyrgäld verhagge isch e sexi politisch Hobby.
Nit nur dr Baschi salbt syyni Oober-Bobby…
Im Roothuus gixt dr Baudep-Kaschperli zu syym Speezi:
„Z Mülhuuse stoot e Liebeshuus! Dert kasch jetzt e bizzli
umme mache, mit dr Piroschka und dr Romana…
s isch graatis fir uns, wenn me winggt mit ere Banaana!
Dasch s Zaiche fir s Baasler-Regierigstheater.
Mir derfe denn alles, und das garantiert ooni Kater!

Dr BVB-Kaschperli hett perseenlig (under em Hemmli)
d Azaalig iibere gschmugglet, mit em Drämmli.
Zwai Millione in bar für dr Maire, dää heerlig Sponti,
ych has besproche mit em Alt-Kaschperli, Carlo Conti.
Dää hett jetzt Zyt, vyyl Erfaarig und au kai Bammel.
Glych wie dr Alt-Kaschperli Ballmer, dää gmietlig Rammel!
Äu är hett mir gsait, wien ych das muess mache,
alles ganz aifach…vor allne Auge…es isch zem Lache!
Es kontrolliert jo kain – und sott dä doch schniffle und muuse,
denn ladsch en aifach yy…zem Schmuuse no Mülhuuse uuse!“