S hett solangs hett

Mr schriibe s Joor Zwaidausigsiebenedriissig,
s isch e Winterdaag und s Wätter isch bissig.
Ych riib mr d Auge, y bi no ganz mied,
dusse isch s dunggel, dr Himmel isch drieb.
D Strooseladärne brenne fascht nimme
uss Energiespaargriend hänn mir die miesse dimme.
Vor iber zwanzig Joor hett dr Bundesroot beschlosse,
mir sinn jetz iber die AKW verdrosse,
Ee bruucht e neie Energiepolitik,
Energie wird gspaart, ooni Kritik.
Daussig neii Veroordnige bestimme jetz s Lääbe,
an die hesch di z halte, sunsch bisch drnääbe.

Statt Villen und Lofts, woonsch hitt wider glai,
maximal 30 m2 läänge fir ebber allai.
Ghaizt mit dr Wärmibumbi uff knapp 18° Graad
und duusche, bitte numme no all andr Dagg.
Maischtens duschisch ee, wenn d Sunne dusse isch,
sunscht bliibt s Wasser kalt und denne isch s frisch.
Iberall uff de Dächer und uff lääre Wänd
hetts Solarzälle zem Wärmi spaichere, amänd.
Bi Sunneschiin kasch kuum mee in dr Stadt ummelaufe,
s bländet  schampar, muess e Sunnebrille kaufe.
Auti faare kenne sich numme no die Ryyche laischte,
d Styyr und dr Biosprit  isch z diir  fir die Allermaischte.
Alles faart Velo oder mit em Drämmli,
das spaart Energie wie verruggt, nämmli.
All daas isch gsetzlig reglemäntiert
und wird vo dr Energiepolizei kontrolliert.

S Aaleege wird dr hit aifach gmacht,
d Mode isch out, mit all iirer Bracht.
Jede drait Glaider solang wie- n- er kaa,
muesch nit allewyl die neyschte Läbels haa.
Die Maischte draage sone farbigi Ainhaitsuniform,
die git s in verschidenen Greese, mit dääre bisch konform.
De glaubsch es nit, was do kasch spaare,
mit däm kasch grad  3x in d Ferie faare,
es nimmt dr alle  Stress mit dr Garderoobe,
bisch immer rächt aagleggt, vo morge bis zoobe.
Sesch immer glych uss in de näggste 10 Joor,
das de älter wirsch, merggsch numme  no an de graue Hoor.
Guet, de seesch s  halt scho de Steffli aa,
was drait e ryche oder arme Maa.
All das isch gsetzlig reglemäntiert
und wird vo dr Energiepolizei kontrolliert.

Y muess gstoo, jetz kunnt s Kapitel, das isch e bitz grass,
denn bim Ässe verstand y au nit soviil Spass.
Zem zmoorge git s numme no yyhaimische Gryttertee,
denne Gaggo und Kaffi kunnt uss Iibersee
und hett do dermit a saumässigi Energiequote
drum hett d Regierig dr Import verbotte.
Joo, und es isch nit numme dr Gryttertee,
Flaisch bruucht viil Energie, drum git s kains mee.
Zwaimool no pro Wuche, genau rationiert
kasch Flaisch go kaufe ,exakt portioniert.
Statt Kie uff de Waide, steen Windrädli dert,
kai Bimmle vo Gleggi, numme eso-n- e Surre, wo steert.
Muesch regional ässe, das isch bsunders gsund,
e Ussnam isch s Tofu-Schappi fir dr Hund.
Im Winter isch s schlimm, denne hetts numme Lauch und Kool,
Wwnn das e Wuche issisch, wird d Verdauig frivool.
All das isch gsetzlig reglemäntiert
und wird vo dr Energiepolizei kontrolliert.

Stromrationierig hett au d Fasnacht erfasst,
vor e baar Joor hett d Regierig e neys Gsetz verpasst.
S isch abgstumme worde, niemerts findet s e Saich,
es gilt syt denne 3 Daag Morgestraich.