Mir sin total digital

(Dr erschti Väärs isch no dr Melodie vom
Volggslied „Im Aargau sin zwai Liebi“ z singe)

An dr Fasnacht sin zwai Liebi,
e Maiteli und e Biebli,
die hän enander so gärn gärn gärn,
die hän enander so gärn!

Als glaine Waggis lauft do s Biebli,
mit ere Naase rot wie e Riebli…
an syynere Syte danzt dausig Pirouette
s Maiteli, als roosarooti Pierrette.

Am Zyschtig Zoobe spoot geege Mitternacht
(vo dr Mittlere Brugg ruessts e friei „Daagwacht“)
steen si unde am Rhy, ganz äng umschlunge –
und tief im Härz vo staargge Gfiel durchdrunge!

Wie s Gsicht vomene Glaun schyynt hell dr Moond,
dr Glanz uff Minschter und Rhy versilberet die Stund…

D Romantigg phaggt jetzt s Biebli und er phaggt syy Schatz!
Doch si joomeret: „Dasch alles fir d Katz,
ich lauf nur uff zwai vo miine vier Depfli,
du druggsch scho wiider die falsche Gnepfli!“

Jä, was isch denn do los?! Was soll das syy?
Ächt an däm Fasnachts-Genre isch nur no der Rhy!
Dr glai Waggis und syni roosarooti Pierrette
sin nämmlig zwai digitali Roboter-Doublette!

Unser Grüppli het Zuekunft, mir sin allne vorus!
Die technischi Entwigglig kunnt bi uns in Schuss!
Mir adaptiere in Ächtzyt, und zwar total
und laufe scho hitte am Cortège digital.
Worum aifach still warte, uff das harti Schiggsaal?
Fasnächtler wäärde iberflissig! Joo, dasch fatal –
aber du erspaarsch dir so au vyyl Drangsaal:
Am Morgeschtraich usschloofe isch jetze legal,
yystoo duet jo unser Gligge-Roboter-Arsenal!
Mit zvyyl Wysse im Ranze ab ins Spidaal?!
Kotz dehaim – und du erspaarsch dir e Skandal!
Drey Dääg volli Erhoolig …
…so eppis isch doch aifach total monumental!

Au s Comité het jetzt die absoluti Kontrolle.
D Wintsch vo de Glygge spiile nimm e Rolle!
D Fasnachts-Ainhaite wärde zentral programmiert,
und s Publikum no Zielgruppe individuell animiert.

Weder Bürgin no Rudolf von Rohr heersch immer lauter,
Die sin ersetzt. Deert hoggt jetzt nämmlig e Compauter
und mänätscht d Route staufrei mit sim neie Rauter.

Au s grosse Publikumm kunnt nimm uff d Gass.
Uff das het e rächte Fasnächtler jo scho lang e Hass!
Alli die Schwoobe, d Mamme, drei Kinder und dr Bappe,
die ganzi Merkel- und Schulz Bagasch mit ire Naarekappe,
steen nur no als stills Hologramm virtuell uff dr Brugg.
Isch dr „Umzuch“ denn fertig, beame mir si aifach zrugg.

D Stadtrainigung macht nei an dr Fasnacht frei.
Me bruucht si nimm, si hogge vor em TV ganz ellai.
D Orange fliege nämmlig hoorgenau in d Händ vo allne Bättel-Affe,
als modärni, sälbscht-programmierendi Färnlängg-Waffe!
Au d Räppli fille nimm als kriminelli Umwält-Polluzion
Stroosse, Drämmlischiine und zletscht no d Kanalisazion.
Sie glitzere in de GUI-Farbe vo dr SAP-Benutzeroberflächi
virtuell als Phinggtli vor unsere Auge, wiene friei Alters-Schwächi.

D Fasnacht wird so e riise Gschäft nyt nur fir Baize.
Speziell em Grosskapital duet si gwaltig yyne haize!
Die Roboter-Kolonne uff dr Strooss draage neii Nämme
vo irne offizielle (!) Sponsore. Dasch nimm yyzdämme
die Entwigglig: So haisst nei zem Biischpiil d OLYMPIA:
«NOVARTIS-firs Härz vom älteri Maa» .
Die stifte s Gold fir d Drummle und d Pille fir die, wo bloose,
wil Manne ooni Fraue rutscht s Härz halt schnäller in d Hoose…

Im Computer nischte frischi Viire vo SP und BASTA
und verdryybe e frienere Kääfer (vom Blocher) aifach mit: „Blatz da!“
Syyterhäär sin d Sujets nimm rächts, sondern linggs politisch korräggt
und Zeedel gits nur no fir Migrante, uff Arabisch, es isch verreggt!
Zeedeldichter draage Vollbart und Turban, jo nyt eppe e Kilt!
D Gsichtserkennig versait sunscht und s Brogramm isch tilt!

Aaber au fir die rächte Basler isch die neii Zyt e Gnuss!
Schnoort zem Biischpiil dr Wessels wiider Stuss,
denn bruuchsch im Grosse Root fir niemer me e Wegger –
denn ziesch em Hampe aifach sälber schnäll dr Stegger!