Uff dr Suechi noonem näggschte Klick

S Händy bimmelet und es kemme iber WhatsApp wiider e Hampfle Föteli vo unsere
Noochbere yyne… Si sinn grad in bella Italia in de Ferie und schigge laufend neui Bildli – me
seet si bim Spaghetti ässe, bim Gelati schlägge, e Selfie vor em schiefe Durm, em
Colosseum, mit em Schwyzer Gardischt vom Papscht, bim Trevi-Brunne (zwische hundert
Andere!), und bim Sunneuntergang am Strand… Mänggmool frooge mir is, ob si bi dr Suechi
noch emme neue Foti-/Selfie-Motiv, dr Momänt iberhaupt no kenne gniesse oder, obs
wichtiger worde isch, none speziellere/speggdakulärere Schnappschuss kenne z mache und
z verschigge!?

Wenn Du kaini Idee mee hesch, wo und wie Du none aimooligs Selfie kenntisch mache,
denn hälfe Dir uff em Netz e huffe Influenzer – si saage Dir, was Du no speziells kasch
unternää oder, wo Du die näggschte – ganz ussergweenlige – Ferie kasch verbringe –
exklusivi Selfies garantiert! Doch, was basiert? Dausigi folge dääne «Empfäälige» und an
dääne sogenannt «spezielle Ort» steen sich d Touris uff de Fiess umme – vo dr spezielle
Stimmig kai Spur – s Zyyl isch ganz klar: alli wänn iri Selfies an dääne Ort mache, wo me si
muess mache! Wieso isch das eso? Muess me eso nimm sälber entschaide?

Was haisst das fir die, wo an dääne Ort lääbe, wenn uffsmool ganzi Horde vo Mensche
uffdauche, um dä spezielli «Klick» vonere Szene z mache, wo si vellicht innere «Netflix
Serie» oder uff Tik Tok gsee hänn? Ire Woonort foot sich radikal afoo verändere – me basst
dr Verkeer und s Aesse in de Baize aa und fyylt sich als Gascht im aigene Woonort… Was
blyybt vo dääne «Selfie-Tourischte»? Vyylmool isch es laider nur dr Abfall und styygendi
Bryys fir die Yyhaimische. D Tourismus-Organisazione seen nur s Gäld und versueche alles
fir die kurzfrischtige Bsuecher z mache – au, wenn die in dääre kurze Zyt, wo si vor Ort sin,
maischtens gar nit vyyl Gäld usgää dien…

Was isch au us em Raise worde? Dr Reschpäggt vor lokale Sitte und Brüüch? Es macht
Angscht, wenn eso wunderscheeni Ort wie Venedig Yydritt verlange mien, um die Masse
vo Bsuecher (Kryyzfaartschiff!) z reduziere. Irgendwenn sinn alli Yyhaimische wägg und
es wird syy, wie wenn me e Museum wurd go aaluege… Das kas doch nit syy!

Mir alli, won is kenne laischte, z verraise, sotte sich wiider mee bewusst wäärde, was es
haisst, immene andere Land, enere andere Kultur zu Gascht z syy und d Mensche und d
Natur an dääne Ort z reschpäggtiere.