Alles laufft us em Rueder

Ir kennet das sicher au, dass alli Noochrichte, Informazione, wo me lääse oder heere duet,
maischtens e negativs oder sogar pessimistischs Gfyyl usleese dien. Me fyylt sich denn wie
erschlaage und verunsicheret, wel sich offebaar alles um aim umme nur no in e negativi
Richtig entwigglet.
Me spyyrt e gwissi Oonmacht, all die Theme wie z.B. s Laid im Zämmehang mit Krieg, die
politische Entwigglige durch ainzelni Machthaber, d Zuewanderig, dr Klimawandel, aber vor
allem au unseri perseenlige Brobleem, wie z.B. dr Faggt, dass s maischte dyyrer worde isch
(nit nur d Granggekasse-Prämie!) z verstoo und sich nit aabezie z loo.
D Medie und vor allem au alli soziale Medie dien die Iberfluetig an Negativem – oft gezielt –
fördere, was vyyli Mensche belaschte und lääme duet und au Aengscht usleest. Wämm nutzt
dää negativi Yyfluss uff d Mensche? Isch dr Mensch zuenere Waar worde, wo me ka styyre
und uffs gwinschte «Fliessband» bringe?
Unseri Wält isch dominiert vo wirtschaftlige und materielle Inträsse, vyyles isch nit transparänt und dr Egoismus soll hälfe, erfolgrych z syy. Fir «Schwächeri» isch kai Blatz uff dääre
Wält.
Was soll me mache? Alles usblände und kaini Noochrichte me luege oder lääse? Isch au nit
wirgglig e Leesig…
Wo isch das «Urvertraue» vom Mensch blyybe, dass unseri Wält, unser «Umfäld» au vyyl
Positivs fir uns baraad hett? Vyyles, wo mir als sälbverstäntlig und kontrollierbar aaluege,
sotte mer wiider brobiere z schätze. Dr perseenligi Umgang mit Mensche, enander zuezloose
und gegeniber Neuem und Ungwoontem offe z syy.
Mir sotte wiider leere, unsere Fokus nit nur uff alles Negativi z ha, sondern unser Lääbe
positiver z gstalte – das kenne ganz glaini «Sache» syy… In unsere «Braitegraad» kenne mer
das (no) – nutze mer die Chance – vyyli Mensche uff dääre Wält hänn die nit.
Mache mer en erschte Schritt an dääre Fasnacht und gniesse die scheene Momänt und s
Brivileeg, dass mir do dra deerfe dailnää. Hoffe mer, dass vyyl positivi Energie wird blyybe…