Het Grien gnueg Pfuus?
Dr CO2-Usstooss uff Null z sängge, das isch vo dr Politygg beschlosse worde und soll umgsetzt wäärde! Nur waiss niemer eso richtig wie…
Um das Zyyl kenne z erraiche, miesste mir alli unsere «Lääbensstil» stargg verändere. Doch wäär vo uns isch gwillt, das z mache?
Lies die näggschte baar Ussaage und denn froog Di, ob das nit au fir Di/Eich – mindeschtens zem Dail – zuedrifft:
- Y gang lieber mit em Auto go schaffe, als im vollgstopfte Zug oder Drämmli z sitze. S Velo nimm y nur, wenn scheen Wätter und s nit z kalt isch.
- Mir hänn bi uns 2 Auti in dr Garage (fir mi en SUV). Wenn mi Maa mit em Auto goot go schaffe, denn bruuch ych doch au ains, wenn y mit de Kinder in d Schuel wott faare, in d Fitness, zer Gwaffeese oder zem Läädele in d Stadt wott go.
- Mir hänn bi uns dehaim 2 Färnsee, 4 Handys, 3 Laptops – mi Maa wott Sport, ych mecht dr neuschti Rosamunde Pilcher luege und d Kinder mien jo kenne gäme oder Netflix luege – eso gits kai Lämbbe. Nadyyrlig hänn mer meereri Laadekaabel, wo in dr Steggdoose druff waarte, d Batterie wiider deerfe z fille.
- Y gang e baar Mool pro Joor in d Ferie… in d Schyyferie im Winter gang mit em Auto, denn kann y s ganze «Schyy Glump» guet mitnää. In de Summerferie flieg y mit em Fluugi ans Meer und fir dr Städte- oder Wellness-Trip iber s Wuchenänd nimm y au dr Flieger – fliege isch jo eso ginschtig!
- Bim Yykaufe vo Lääbensmittel han y halt gäärn s ganzi Joor mini Aerbeeri und au Ananas-Stiggli fir in Fruchtsalaat – au, wenn die halt vom andere Aendi vo dr Wält kemme.
- Ych iss gäärn vyyl Flaisch, am liebschte hann y esone guets Steak vo Argentinische Rinder.
- Ych due gäärn «Schnäppli» kaufe, vor allem online hets immer gueti Aagebott. Wohäär die kaufte Produggt kemme und wie wyt si mien transportiert wäärde, interessiert mi denn nit.
- Zu jedere Saison vom Joor kauf ych mir gäärn neii Glaider und Schue – me muess jo modisch usgsee! Wenn mer s neii Modäll gfallt, denn lueg y nit, wo und wies broduziert worde isch. D Glaider und Schue, wo nimm ganz «aggduell» sinn, gib y in d Glaidersammlig vom «Rote Gryz».
- Jetzt wänn si uff em Hiigel in dr Neechi vo unserem Huus Windrääder installiere. Das find ych denn gar nit guet, das verschandlet d Landschaft und die sin lutt – do wird ych sicher dergeege abstimme – die solle en andere Blatz derfiir finde!
- Deert, wo mir immer sin go Schyy faare, wänn si jetze an zwai Häng Solaar-Aalaage installiere – das seet denn gar nit scheen us! D «Schnee-Kanone» bruuche mer aber – sunscht wirds denn nit mee mit de Winterferie…
Wie wänn mir us all däm «usbräche» und is «yyschrängge»? Me het jo scho gsee, wie schwierig das bi «Corona» gsi isch. D Wirtschaft meecht/sott immer wyter waggse – wenn nit, was basiert denn z.B. mit de Aarbedsblätz? Es wird neii Technologie gää, aber bis wenn, und wäär zaalt fir d Entwigglig?
Mir hänn 1 Aerde, die mien mer pflääge – denn kloone losst si sich nit… D Natur wird immer «stärgger» syy als dr Mensch! CO2-Usstooss uff Null bringe – realistisch? Mir dängge nai…