Mir hänn offe!

„Basel macht dicht“ sait dr Regierigsroot…
D Glabbe zue und dr Aff isch doot!
Unhaimligi Monschter steen am Spaalebärg
und mache di Kaare zem Gaartezwäärg.
Si spiessen en uff wie e sälte Insäggt
und schiggen en uff en Abbruch, total verdräggt.
Faarsch die Freyi durab, zer falsche Zyt
denn lynche di Velofaarer und rot-grieni Lyt,
wo deerte verainzelt no steen und luure
ob si ächt ain kenne schnappe und denn yymuure
bi lebändigem Lyyb, aber nit ebbe duss uf em Höörnli,
dr Friedhof syyg nei am Märtplatz,
sait mir grad dr Wernli.

D Lääde mache dicht, ain non em andere,
mir finde nyt mee und mien usswandere
ins Zenter noch Allschwil oder Muttenz am Oobe,
oder no wyter uuse, diräggt zu de Schwoobe.

D Regierig hilft is uf dääre Pilgerrais,
si fagglet nit lang und macht kai Mais!
Si dribbt is zämme wien e Härde Lämmer,
mir wärde verlaade, und denne hämmer
nur 10 Minute ins Gligg – mit dr Linie acht;
z Basel, in dr Altstadt, wirds langsam Nacht.

Au d Kepf mache dicht und d Müüler geen zue.
Gedangge sinn gfäärlig, mir luege bleed wien e Kue
wo stumm und aifältig noonemool muess mampfe,
was sie brav gfrässe hett. Derzue derf si dampfe.
Die „Politisch Koräggthait“ isch das vegani Fuetter,
wo uns die Mächtige vorsetze, und wien e Muetter
is yyneschoppe, Leffel fir Leffel, bis zem Verjaage
und bis kaine me waiss, was är aigetlig mecht saage.

S Volgg will nimme schlugge, was d Politiker koche,
kai Sprächverbott und kaini Millione zem Verloche!

Au Europa macht dicht und schliesst sini Gränze.
Basler Gugge derfe bald nimm uff Gränzach go schränze!
Dr Zoll wird bsetzt vo Schwoobe mit Maschinepischtoole,
glych wie d Schweede und d Dääne und d Finne moole
au si bald dr Deifel an d Wand und speere kollektiv
grad alles uss! Isch denn d Mamme Merggel so naiv
oder waiss si s nit besser, dass me muess unterschaide
Flichtling vo Profiteure, und dass me nit baide
Gaschträcht ka gää, glyych wie unseri Schwyzer Richter?
Und so wärde d Gränze halt fir alli immer dichter.

Derfiir blyybe mir Guetmensche und maines nie schlächt
und sinn moralisch halt immer im Rächt.

Dr BZG-Kiosgg dergääge hett offe und blyybt offe!
Mir faare duur die dooti Innestadt und hoffe
trotzdäm uff Jungi und Alti, uff vyyli Glyännte,
sottigi mit Arbet oder ooni und uff die mit dr Ränte.
Schwyzer und Ussländer und Kinder wärde bedient,
si alli hänn unser grossi Uuswaal verdient.

Starggi Raucher und au Alkis kemme zu irem guete Rächt,
das sinn au feyni Mensche, und die macht is niemer schlächt!
Beamti mit phingligge Vorschrifte und aggressivi Vegetarier?
Do pfyffe mir druff wie eppe uff stränggläubigi Arier!
Au fiere mir Schläggzyyg mit vyyl siessem Zugger,
s Bundesamt fir Gsundhait isch bi uns nit am Drugger!
Im Lääse-Egge hängt d WOZ und d Wältwuche,
d BAZ, dr Globi und au d Tageswuche.
Alli Mainige sinn verdrätte und warte do uf eich,
linggi und rächti, sogar dr politisch korräggti Saich!
In scheene Heftli dien sich blutti Fraue rääkele,
nadyyrlig äu Männer, s muess do kaine määkele,
s kunnt niemer z kurz, mir hänn offe rund um d Uur,
und leen is nyt lo saage und faare in unserer Spuur.