Hokus, pokus, verschwindibus !

Ich bi dr Fritz Geissbühler vo Lotzwil,
mir goot s nit so guet, ha zem Lääbe nit vyyl.
Ha halt Bääch gha in dr Schuel und speeter im Tschobb,
au d Familie vo mir isch eender e Flobb.
D Muetter und dr Vatter hogge numme in dr Baiz
und elai dehai het kai groosse Raiz.
Bi frie ussgrisse und ab uff d Gass,
ha vyyl erläbt, Druurigs, aaber au Gspass,
ha grampft uff em Bau, ha my vyyl miesse bugge
und jetze hann ych s halt im Rugge.
Zeerscht hann ych dr Schnaps uff e Rugge gschmiirt,
zwischeduure au eppe e Schliggli brobiert,
am Schluss hann ych s Yyryybe ganz lo syy
und nimm dr Schnaps jetz oral yy.

Y hogg alldaag vor em Bahnhof SBBee,
deert isch allewyyl eppis loos, kasch e Huffe gsee,
driff myny Speezi, mr hänn s zämme glatt,
sy kemme deert aane uss dr ganze Stadt.
Mr sitze uff de Bänggli und luege de Tourischte zue:
„Hey, hesch mr e Stutz , denn lo dy in Rue!“
S bassiert au, dass mr händle und ummestrytte,
aaber wenn mr schleegle, duet d Bolizey yyschrytte.
Me kennt sich jo guet, s laufft rächt mitenand,
also sitze mr wider ab und mache kai Schand.

Im Summer kunnt dr Schorsch und isch ganz uffgreggt,
jetz haige si en aaber schampar verschreggt.
Am TiVi däät son e Laggel saage,
mir wurde alli Tourischte verjaage,
mir mien deert ewägg uff jeede Fall,
schliesslig sygg dr Bahnhof s Yygangsbortal
in d Schwyz, wo s suuber isch und alles duet blingge
do steere Settigi wo ummehogge und dringge.

Dr Brutschin delifoniert em Hanspi Gass,
loos, dr Egloff und d Hotel versteen doo kai Gspass,
das schaadet dr Wirtschaft, s bruucht mee Bolizey,
lueg, dass die ewägg kemme, ooni groosses Gschrey.
Fir d Schugger laufft aigentlig nyt, wo sy aazaige kenne,
numme will e baar Closchard vor em Bahnhof penne.
So lyttet dr Gass em Guy Morin aa,
du Stapi, jetz isch dyy Departemänt draa.
Duu bisch verantwoortlig fir s Marggeding vo dr Stadt,
gryff duure, aaber bitte grad.
Hmm, dänggt dr Morin, was sell ych doo mache,
wääge Randstäändige wird ych mi mit niemerem vergrache.
Die Bänggli mien fuurt mit de Penner derzue,
denn isch uff em Bahnhofsplatz wider Rue.
Fir Bänggli isch s Baudep und dr Wessels zueständig,
die Nummere waiss ych grad usswändig.
Dr Wessels maint, Morin, goot s diir no guet,
mit däm hann ych aaber grad gar nyt am Huet.
Me kaa doch nit aifach Bänggli abmontiere
und mitsamt de Lyt naimets anderscht plaziere.
Daas isch e soziaals Brobleem, das muess me behandle,
drmit die nit lenger d Stadt dien verschandle.
Me muess dääne hälfe mit Glaider und Ässe,
ere Woonig und e Uffgoob, sunscht kaasch s grad vergässe.
Fir daas isch nämlig dr Brutschin doo,
die mien zem Sozialamt, denn wurd s iine besser goo.

D Ämter hänn e Summer lang diskutiert
und mit uns am Bahnhof isch gaar nyt bassiert.
Mir höggle uff de Bänggli und luege de Tourischte zue:
„Hey, hesch mr e Stutz, denn lo dy in Rue!“