Zeedel

Mir sinn umschwäärmt

E Muggeschwaarm uss Saamarindaa
suecht e Blätzli fir syyni Kinder.
Sy leege d Aier in e Pfitze
zooberscht uff ere Bnööbäärgspitze.
Bivoor die Aier kenne schlipfe,
duet epper dr ganzi Bäärg wägg lipfe,
ab in Haafe, uff e Schiff und drvoo,
esoo sinn die Laarve no Itaalie koo.

Deert isch es fiecht und gmietlig waarm
drum schlieft e Diigermuggeschwaarm.
Die glaine Asiate sinn haissi Grieger,
wäär sy stäche, dää bikunnt Fieber.
Und das Pesto- und Pastabluet vo de Tschingge,
dien d Mugge lieber als Cöörrygschmagg dringge.
D Muggefamilie verbraite sich
und männge Italiääner hett e Stich.

S Muggemammi sait, d Kinder schoon y,
ych stich lieber dr Berluscooni,
mit sovyyl Stich, wie dää scho hett,
isch dää numme no im Bett.
Au s Bluet vom Eros Ramazotti
isch eppis, was me versueche sotti.
Wenn dä bäägt : Aadesso tuu
sticht sicher grad e Mugge zue.
Bi dr Sophia Loren wiirggt son e Punggtuur
sofoort wien e Botox Kuur.
Dr Paapscht brummlet im Consilium
är isch non eme Stich im Delirium.

Aaber Mugge die dien Wasser liebe
drum wäärde sy uss Itaalie verdriibe.
Im Summer droggnet deert alles uss,
daas isch fir Schnooge gaar kai Gnuss.
Also verbraite sich die Hoorde
aifach wyter non em Noorde.
Noo meerere Stich bi dr Nella Martinetti
sait dr Tessin s isch nimme paletti.
Diigermugge hän bi uns nyt z brichte,
die mien mr jetz radikaal vernichte.
Doch unseri gfizte Asiate
dien uff dr näggschti Laschti waarte,
dääwääg sin die Mugge no dis no
bis vor unseri Stadtdoor koo.

Dr eerschti Stich gspyyrt d Gigi Oeri,
druff meerggt sy, dass dr Gross sy steeri,
no däm Yyfall wird ganz flingg,
dr Gross ersetzt mit eme Fink.

D Sunneblueme vom Vincent
sinn fir Schnooge e Presänt.
In die riisige Menschedruube
dien sich Mugge aabeschruube.
Die Bsuecher fiile sich bsunderbaar
und gseen d Bilder nimme glaar.

Dr Hirschmaa, nit dr Alt, dr Soon,
haut um sich nom ene Stich im Noohn.
Aigentlig hett är niemerts welle schloo,
är isch numme ere Diigermugge noo.

Unseri Regierig kaasch au nit erhälle
die lyyde under ere Fieberwälle,
bewillige im Summer voor dr Roothuusfassaade
doch glatt e Panzermilidäärparaade.
Und wenn me denn wiirgglig e Bygg setti haa,
isch unsere Kanton als Letschte draa.
D Gribbe-Pandemyy-Iebig goot in d Hoose
drotz Chemie dehai, git s bi uns kaini Impfdoose.

S ergläärt au worum alli renne
um d Stücki-Ereffnig nit z verpenne.
Und statt däm, wo de lang scho suechsch,
hesch eppis dehai wo de nit bruuchsch.
So juggt s am Speerguetdaag e jeede Beppi
alles uuse z gheie, was är nimm wetti.

E Byggs hett au dr Thiriet,
dä will kai ‘Charivari’ mee.
Drgeege unser Fasnachtscomité
wirtsch au in hundert Joor no gsee.
Wenn de waisch vo dääre Diigermugge
kaasch alles exblyziere ooni Lugge.

Doch s Fasnachtsfieber, ych bi soo froo,
isch nit vo dr Diigermugge koo.
Drotzdäm s isch wie Malariaa
de kaasch es all Joor wiider haa.
S bricht uss an de drei scheenschte Dääg,
die maischte Basler sinn ainewääg zwääg.
Miir bruuche kai Impfig und au kaini Pille
wenn d Frau Fasnacht uns in iiri Wält duet hille.